عانس !!..اعوذ بالله

عانس !! .. أعوذ بالله
من malak elhob

نهار داخلي- صالة منزل مصري
مدام "دلال" تجلس في الكرسي المقابل لجارتها القديمة "درية"، بعد أن أدّت واجب الضيافة، تبدأ "درية" بفتح الموضوع بطريقة غير مباشرة.
درية: إلا هي فين "حنان" بنتك؟.. والله بقالي زمن ما شفتهاش..

دلال: آه مع صاحباتها نزلوا يشتروا حاجات..

درية: ويا ترى اتخطبت ولا اتجوزت.. اوعي تكوني ما عزمتنيش!

دلال: وأنا أقدر برضه ده يوم المُنى يا حبيبتي.. بس أهو بقى لسه النصيب ما دقش الباب.. قعدت ترفض في ده وده وده.. لحد خلاص.. البنت اتعقدت كمان وحاسة إنها هتعيش عمرها كله وحدانية.. ما أنا مش هعيش لها على طول..

تقاطعها درية: ما تقوليش كده، ربنا يخليكِ ليها وتفرحي بيها، وبعدين الحاجات دي قسمة ونصيب.. وبعدين على رأي المثل.. "قعدة الخزانة، ولا جوازة الندامة"..

دلال: قسمة ونصيب ماشي ما اعترضناش، طيب وكلام الناس.. ولما يقولوا عليها بايرة ولا عانس.. ويا ريته على قد كده كنت سكت..

درية "بنبرة قلقة": خير يا أختي كفى الله الشر؟

دلال: خايفة لحد يتكلم عليها بالبطال.. يعني إيه اللي مانعها تتجوز لحد دلوقتي وهي زي القمر وحلوة إلا إذا كانت ماشية لها مع حد..

درية بفزع: لا يا دلال ما تبشريش على البنية.. يتقطع لسانه اللي يقول كده.. إنتِ بتتوهمي!

دلال: على أيامنا كانوا بيقولوا كده.. أمال هيقولوا إيه اليومين دول؟.. ينوبك ثواب يا درية إنتِ زي أختي والله ولولا كده ما كنت فاتحتك أبدًا في الموضوع.. أنا موصية أكتر من حد يجيب لها عريس.. أي عريس.. أي عريس.. مش مهم المؤهل ولا الكلام الماسخ اللي جابنا ورا ده.. المهم البنت تتستر وأفرح بيها بقى وماحدش يشمت فيّ..

درية: والله إنتِ بنت حلال.. أنا كنت هافاتحك في الموضوع ده.. "فتحي" لسه جاي من الخليج وعايز يتجوز وبيدور على عروسة.. "فتحي" ابن أختي لو فاكراه.. معاه دبلوم صنايع بس بقى حاجة تانية.. بيقولوا له يا باشمهندس!

دلال: وعنده كام سنة؟

درية: مش كبير بتاع 35 سنة يعني قريب من سن "حنان".. هاتفق معاهم على الموضوع، ونحدد مَعَاد إن شاء الله.. ومبروك مقدماً يا حبيبتي

دلال: الله يبارك فيكِ.. ربنا ما يوقعك في ضيقة أبداً.. خدي صورتها أهي
!

*******

ليل داخلي- منزل أم "فتحي"

بعد العشاء تحاول "أم فتحي" مفاتحته في موضوع العروسة "حنان" التي حدثتها عنها "درية" أختها..

أم "فتحي": أخيرًا يا "فتحي" هنفرح بيك.. بنت الحلال اللي تستاهلك موجودة بس إنت تأشر..

"فتحي" باهتمام: صحيح يا ماما؟ لقيتوها؟.. ويا ترى عندها كام سنة.. و..

تقاطعه أمه: حيلك حيلك.. خالتك درية كلمتني عنها النهارده.. زي القمر ومعاها بكالوريوس علوم، يعني متعلمة تعليم عالي.. وسنها قريب من سنك يعني تناسبك..

"فتحي" يعد على أصابعه بسذاجة ليحسب فارق السن": آه سنها قريب من سني يعني بالكتير عندها 20 - 22 سنة!

أم "فتحي": فرق 15 سنة يا ابني!.. لا ده فرق 5 سنين بس وكام شهر..

"فتحي" مندهشًا: نعم قصدك 29 سنة وحاجة؟.. يعني 30 سنة!.. يعني واحدة داس عليها المترو والقطر والنقل العام.. قولي كلام غير ده يا ماما!

أم "فتحي": وفيها إيه يا ابني.. ربنا عرفوه بالعقل.. الحاجات دي نصيب.. ومش معنى إنها قعدت كل ده من غير جواز إنها وحشة.. دي بنت طيبة ومنكسرة ومعاها شهادة عالية.. وسنها قريب من سنك يعني تتجوز عيّلة تطلع عينك.. حتى شوف صورتها..

يلتقط "فتحي" منها الصورة قائلاً: آه هي - الله الوكيل- حلوة.. بس ما تلزمنيش يا ماما.. دي عندها 30 سنة عارفة يعني ايه؟.. أنا بصراحة ما أقبلش أتجوز واحدة عشان بعد كده أعالجها!

أم "فتحي": تعالجها ليه بعد الشر البنت زي الفل؟..

"فتحي": السن له أحكام يا أم "فتحي".. دول 30 سنة يعني مؤبد + 5 سنين جُنح!.. طظ في شهادتها اللي أعلى من شهادتي.. بفلوسي اتجوز بنت السلطان.. دوري لي على بنت صغيورة لسه في جامعة، تدلعني، تعدل مزاجي.. مش أصوم أصوم وأفطر على حاجة جملي كده.. انسي الموضوع ده يا ماما
!

*******

فيه ناس هتتنرفز وتطلع عفاريتها لما تسمع الكلام ده!
بيتكلم إزاي الأخ اللي فوق ده.. الحكاية قسمة!
جنح؟
مؤبد؟
جملي؟!!
هي غدوة ولا جوازة؟
مش يتجوز واحدة عاقلة قريبة من جيله وسنه؟؟..

وناس تانية بيقولوا على أنفسهم واقعيين.. عايشين الواقع
طبعًا من حقه يتجوز الصغيرة تدلعه.. مش واحدة عانس!
وليه يتجوز بنت التلاتين لما تكون بنات العشرين "أكتر من الهم على القلب"؟
وليه البنت قعدت لتلاتين سنة من غير عريس.. أكيد الحكاية فيها إنّ!

البنات أنفسهم لما سألناهم عن الإحساس اللي ممكن يداهمهم لو وصلوا للثلاثين من غير زواج كانت إجاباتهم متباينة..
"أكيد كل واحدة محتاجة لوجود "هو" في حياتها، وكذلك الأمر بالنسبة للراجل.. بس لو ماجاش يعني الدنيا تقف؟.. أكيد البنت لما تكون مستقلة مادياً وعندها شغل مش هتشغلها المشكلة لفترة.. بس أرجع وأقول انها هتفتقد هذا الوجود المهم.. المهم ما تأثرش عليها نظرة المجتمع وتقبل بأي عريس والسلام عشان تهرب"..
بنت تانية كان لها رأي مختلف..
"يا خبر.. بعد الشر بعد الشر.. أقعد من غير جواز.. أنا ممكن اتجوز واحد مش حابّاه ومش طايقاه.. عشان ما آخدش لقب عانس.. وبعدين إذا ما كانش هو حنيّن.. لما أجيب عيال هيعوضوني عن حنيته.. الوحدة وحشة.. قال عانس قال
"!

نقره على هذا الشريط لعرض الصورة بالمقاس الحقيقي

سيدة تزوجت بعد الثلاثين قالت:
"كانوا الأول العرسان كتير.. الظابط والمهندس و... والدي كان بيرفض لأسباب كتير مش موضوعية.. فضل يرفض يرفض.. لحد خلاص ما قربت من عتبة التلاتين.. نوعية العرسان اختلفت.. اللي معاه إعدادية واللي واخد دبلوم.. ويمكن بعد كده اختفت كمان النوعية دي من العرسان.. لحد ما بقيت أتمنى أتجوز حد معاه دبلوم أو أقل مني تعليماً عشان قسوة الوحدة ونظرات الناس اللي ما بترحمش.. وأخيراً اتجوزت.. مُطلق.. وعنده ولد وبنت.. أرحم من إني أكون عانس.."

إحصائيات العنوسة في الوطن العربي بحسب ما ذكرت (مجلة العلوم الاجتماعية) خطيرة.. لكن لنرَ الإحصائيات الخاصة بمصر الصادرة عن (المركز القومي للبحوث الاجتماعية والجنائية)
"نسبة غير المتزوجين من الشباب من الجنسين بلغت بشكل عام حوالي 30%، وبالتحديد 29.7% للذكور، و28.4% للإناث"

*******
يا ترى إنت شايف الموضوع إزاي؟
ممكن تتجوز واحدة عدّت الثلاثين؟..

ويا ترى إنتِ كبنت
شايفة إن الاستقلال المادي والنجاح العملي
ممكن يشغلك عن الزواج

ويخليكِ ما تاخديش في بالك من كلام الناس..
عانس.. أو مش عانس؟؟

ولا الموضوع مهما كان احتياج طبيعي للاستقرار العاطفي..

وإن كل ما قربتِ من الثلاثين..
كل ما خوفك من العنوسة زاد؟
منقول

والله واحد هايف بجد
تسلم ايدك

الله يسلمك يا قمر من اللى هايف اللى كتبه ولا اللى نقلته عامه عادى الاتنين هايفين ههههههههههههههههههه

لا طبعا اللى نقلته عسل وامورة وانا بحبها

ربنا يكريمك ويباركلك يارب انتى اللى رفاعه من معنوياتى يا عسل

ربنا يخليكى ليا يا هاجر

ميرسي ياهاجر علي موضوعك
وهو فعلا موضوع مهم اوي
بس طبعا الواد اللي فوق دة نرفزني اوي
طيب معلش ماهو ممكن ياخد
ال عندها 20 او 22 وبعد مايتجوزها
يجيلها امراض الدنيا
ومتقدرش تتحرك
ومالها اللي عندها 30 سنة عنست ازاي يعني
نقصها ايد ولا رجل
بجد ناس متخلفه اللي بتفكر كدا
واية بفلوسة يتجوز بنت السلطان
فلوسة دي هتعمله اية لما يمرض
هتشيله ولا الزوجة الصالحة بنت الاصول
اللي هتشيله في مرضه
وكمان بفلوسة دي كلمة تنرفز لوحدها
بيحسسني انة هيشتري شروة
بجد موضوع نرفزني اوي بكلام الهايف اللي فوق
بس انتي ناقشتي موضوع مهم اوي
وزاد في دنيتنا اوي
وانا طبعا مع الناس اللي بتقول
ان زي ما البنت محتاجة لسند ووجود راجل في حياتها
برضو الرجل محتاج لحنان الانثي في حياتة
لان الاتنين بيكملوا بعض
وميرسي اوي علي موضوعك
وسوري علي الاطاله
بس موضوعك مهم بجد
تقبلي مروري

عانس !!..اعوذ بالله 303869

يا بسبوسه ما كلام الستات والناس الفاضيه كتير ومش سهل دا ممكن يطلعوا سمعه على البت من غير ما يكون فى حاجه وخاصه بقى تلاقى الناس وخدين بلهم من البت اوى وعلى فكره ردك جامد جدا ومفهوش اى اطاله وعندك حق فى كل اللى قولته والله انا نقلت الموضوع علشان انا سعات بسمع كلام من دا فى الناس فى الشارع وفى كل مكان لو الناس تسيب بعضها فى حالها هنعيش احلى عيشه

موضوع جامد جدا يا هاجر
تسلم ايدك
وانا ردى زى رد بسبوسه بظبط
وتسلم ايدك كمان مره

وتسلملى على الرد يا قمر

اما موضوع مهم بشكل
ناس كتير للاسف بتفكر زى البنى ادم دا
ليه اخد واحدة تلاتين سنة
وانا قدامى اللى اصغر منها
للاسف التفكير دا حرم بنات كتير من حقها الطبيعى فى اختيار شريك حياتها
واصبحت مرفوضة من العرسان رغم جمالها واخلاقها
وتعليمها العالى
انا من رايى:ان البنت لو العريس اتاخر يعنى ان كانت بتستناه
هههههههههههه
تبدا تعمل لنفسها حياة عملية
وتشتغل او تكمل دراسات
وبكدا تكون حققت ذاتها
لكن ما تقعدش تستنى
هيجى ولا لا
وميهمهاش كلام الناس
تسلمى يا هاج على موضوعك

موضوعك مهم جدا هاجر
وبصراحة
انا كمان رد الولد نرفزنى زى بسبس

وكمان انا معاها جدا فى رئيها

بس بردوه الحياة مش من المفروض توقف بينا لاى سبب
مشكووورة هاجر
تسلم ايدك

عانس !!..اعوذ بالله 303869

تسلم ايدك يا قراوله انتى ومنى على الرد