لفات طرح جاهزة....فكرة جديدة.

فكرة جديدة وعملية جدا وخاصة للبنات اللي عندهم مشكلة في ربط الإيشارب بطريقة صحيحة وعلى الموضة. كتير من البنات بتسأل عن ربطات الإيشارب الجديدة وعن لفات الطرح.. وطريقة لبسها





إيه رأيك تجربي رابطة جاهزة من تصميمات "وجدان حمزة" المتخصصة في تصميم الحجاب...

ترى وجدان حمزة أن الحياة العملية وضيق الوقت لا يسمحان بأن تقف البنت طويلا أمام المرآة لكي تلف الطرحة وتربط الإيشارب ربطات متنوعة وتكون مضبوطة ففكرت في تصميم أشكال متنوعة من الحجاب تكون جاهزة للبس بدون استخدام دبابيس ولا تحتاج إلى خبيرة في لفات الطرح



لماذا فكرت في صنع حجاب جاهز؟
أحيانا لا تجد البنت وقتا للف الطرحة بطريقة مبتكرة فتلجأ إلى ربطتها القديمة التقليدية أو تخشى أن تجرب حاجة جديدة ما تعرفش تربطها صح فيكون شكلها وحش أو تفك منها مع الحركة الكثيرة.. أعتقد أن الحياة بإيقاعها السريع تحتاج إلى حجاب عملي نلبسه في لحظة وكمان يكون على الموضة والأهم ألا يكون شكله في نهاية اليوم مبهدل ومفكوك والدباببيس واقعة منه.



سر اهتمامك بأزياء المحجبات؟
كنت في وقت سابق أساهم في إصدار مجلة "أناقة وحشمة" مع شقيقتي الإعلامية كاريمان حمزة وكانت مجلة متخصصة في ملابس المححبات والإيشاربات والأقمشة اكتشفنا أن علينا أن نهتم بشكل الحجاب لأنه الإكسسوار الأساسي الذي تعتمد عليه المحجبة... ومهم جدا أن تختار بعناية نوعية القماش ومدى توافقه مع ملابسها.



ازاي نختار الحجاب المناسب؟
لازم يكون قماش الحجاب ماشي مع طبيعة اللبس بمعنى لو اللبس كاجوال نختار الأقطان ولو اللبس فيه رسمي أو فيه قطعة حرير أو ستان نختار حجاب حرير أو داخل في تكوينه تل أو شيفون.



من الحاجات المهمة أن نحرص على لبس حجاب صحي.
بمعنى ؟
بمعنى أن يسمح للشعر بالتنفس حتى لا يتساقط الشعر...



معنى كده إن الحجاب بيسبب سقوط الشعر؟
لا طبعا ولكن ما أقصده أن تكون طبيعة القماش صحية زي الأقطان ولو استخدمنا خامات صناعية لازم الشعر يتلف بقطة من القماش خفيفة تشبه الشاش لتسمح بدخول الهواء..عشان كده حرصت على تبطين الحجاب سواء الحرير أو أي قماش يحتوي على ألياف صناعية ببطانة من القطن الخفيف للحفاظ على الشعر وعلى ثبات الربطة.



موضة 2007 في الألوان ؟
الموضة اللون الأخضر بدرجاته الفاتحة تحديدا والأصفر بدرجاته والموف بدرجاته الفاتحة.. اللون الفاتح بيفرض نفسه بقوة هذا الموسم.



الموضة في خامة الحجاب؟
الأقطان طبعا لها الصدارة بالإضافة للشيفون والتل والحرير.
من الحاجات الموضة قوي دخول "شريط البييه" على الحجاب والتطريز سواء بالخرز أو القطع الخشبية والحلي المعدن البسيط.



لمسات وجدان حمزة على ربطات حجاب 2007؟
حرصت على تنفيذ كل الربطات الجديدة التي من أشهرها الرابطة الجانبية ورابطة ذيل الحصان والضفيرة وهي مناسبة جدا للبنات في الجامعة.

هدفي الأساسي هو لبس حجاب عملي وشيك يحبب البنات في الحجاب.
من الحاجات اللي حرصت عليها تصميم "كواف" غطاء رأس وطرحه جاهزة للعروسة المحجبة...




العروسة المحجبة ازاي تختار طرحة وغطاء للرأس مناسب؟
تصميم" الكواف" لازم يكون قريب من الفستان والبساطة هي سر الجمال لأي عروسه.



مهم جدا لو العروسة بتفضل التطريز يكون من نفس تطريز الفستان.



وتستخدم نفس الخامات لو الفستان فيه جبير أو كريستال تستخدمه في تصميم الكواف وطبعا التل الأبيض للطرحة.



أخبار الربطات السواريه؟
الربطات السواريه مهم جدا تكون كمان قريبة من تصميم اللبس وعلى فكرة كل الخامات اللي نازلة موضة في الفساتين بنستخدمها حاليا في تصميم ربطات سواريه زي التل والستان





نصيحتك للبنات المحجبات؟
نصيحتي للبنات الحرص على الاحتشام ... ازاي نلبس إيشارب على شعرنا ونلبس بنطلون ضيق جدا أو بدي يفصل شكل الجسم، مواصفات الحجاب الأساسية إنه لا يشف ولا يصف في ما عدا ذلك للمحجبة حرية اختيار الألوان والتصميم لملابسها.. النهارده أصبح أمام المحجبة فرصة كبيرة تختار بين تصميمات مختلفة... والمتخصصات في ملابس الحجاب الآن على أرقى مستوى.. المحجبة لا تقل أناقة وجمال عن غير المحجبة في كل شيء.



هناك بعض البنات بيفضلوا لبس الحجاب أولا وبعد كده تأتي خطوة توسيع اللبس كبداية؟
أنا مع التدرج في كل شيء عشان تستمر وتثبت على قرار لبس الحجاب.. رأيي البنت اللي بتفكر في الحجاب تبدأ في توسيع ملابسها لو كانت متعودة تلبس ضيق جدا وتتأقلم مع الشكل الجديد قبل لبس الحجاب

ولا أعني أبدا بتوسيع الملابس البهدلة والواسع قوي لكن الواسع المتوافق مع شروط الحجاب.

ولكن الأهم من لبس الحجاب أن نبدأ من داخلنا نلتزم في تصرفاتنا ونخلي جوانا حلو عشان يظهر على وجوهنا.